麥明詩中秋激情打茄輪咀到畀人睥！
向來敢言的麥明詩語不驚人誓不休，節目中自爆曾與初戀對象「打茄輪」賀中秋，事後受訪直言只是平常事！提到萬聖節將至，她坦言Dry到爆，望招募「兵仔」護駕遊鬼屋，更揚言要搵夠三個！
麥明詩（Louisa）及馮盈盈兩位港姐冠軍在節目《#後生仔傾吓偈》以敢言見稱，經常有爆炸性話題，日前她們以中秋節為主題，Louisa自爆17歲情史，透露過了激情一夜：「記得初戀時第一個比較浪漫嘅節日就係中秋節，去咗公園點蠟燭，但最後成晚都係打茄輪！」拍檔盈盈食住月餅淡然附和：「好正常啫！」Louisa自爆媽咪亦知情，更問她是否要再打扮一下，又笑說：「我記得錫到好多人睥我哋！」
Louisa事後受訪，提到言論引起網民熱議，她否認是節目效果，亦認為只是正常事：「冇乜邊對情侶未試過呀，都係同大家分享啲大家都做過嘅嘢，冇咩特別。」
叫馬國明帶心穎玩鬼屋
另外，Louisa昨日偕馬國明及羅蘭出席萬聖節活動，直言未有伴，又笑說：「睇吓邊個得閒，不過唔會同父母去，怕嚇親佢哋。我諗都會有幾張飛，或者我招募吓啦！（應該好多人肯？）我要搵夠三個，三個方位幫我擋鬼！」
她更落足嘴頭，叫馬國明帶女友黃心穎遊鬼屋，笑言有助釋放賀爾蒙增進感情，馬國明笑說：「同朋友去啦！（嚇到攬住你？）男仔都係想咁！（試過？）幻想吓，現實冇啦，今年睇吓點啦！（或者佢唔驚？）咁我扮驚囉，要有人驚先好玩！」
