吳君麗病逝終年84歲

60、70年代粵語片紅星吳君麗，昨日傍晚時分因病離世！據知她近月身體狀況已經不太好，亦曾因肺積水入院，近日情況愈來愈差。其治喪委員會昨晚發訃文，內容如下：「我們敬愛的吳君麗小姐，痛於公曆二零一八年九月二十六日（星期三）黃昏安詳辭世。謹致深切哀悼。大殮日期及地點容後相告。」

家人早有心理準備

她的一班好友丁羽、黃夏蕙、譚炳文女兒譚淑瑩等昨晚均收到消息，丁羽指從大律師朋友口中得知噩耗，深表哀痛。譚淑瑩亦表示剛收到契媽呂林志嫦通知，因父親譚炳文身體不太好，故暫未告之父親，至於當年經常跟吳君麗合作的胡楓，日前曾兩度到醫院探望，當時她的情況已不佳，他說：「早兩日探過佢，佢當時喺醫院病重，但咩病就唔知，我喺迎月嗰日去探佢嘅，佢當時瞓緊覺，到第二日中秋嗰日再去探佢，我見佢仲擘大眼，我有問佢認唔認得我，佢只係眨咗一下眼，我見佢個樣好精神，唔係暴瘦，佢家人都同我講：『係呢幾日o架啦。』」

黃夏蕙：佢唔肯畀人知

黃夏蕙表示與吳君麗由細玩到大，非常老友，但坦言對方不欲公開病情，所以她都低調探病：「佢唔肯畀人知，我哋都知佢身體唔係幾好。有次佢入醫院都係記者話番畀我聽，我之後問佢，佢就認咗，麗姐為人比較怕事，入醫院唔會話畀人聽。（咩病？）好似係肺積水定唔知咩，我哋唔好意思問。」她指吳君麗之前曾移民新加坡及美國，雙方對上一次見面是數周前：「我話我就嚟籌款，邀請佢嚟唱吓，佢仲話得，我仲問佢身體好番未。」

而薛家燕昨晚錄影無綫節目《流行經典50年》，對於吳君麗離世，她說：「我唔知，聽到呢個消息我真係好想喊，佢之前仲嚟飲我個仔娶老婆嗰餐！依家錄緊節目，睇吓中間有冇時間，試吓聯絡佢屋企人睇吓咩情況。」