何超蓮狂奔險仆搵Baby集郵

向來對時尚甚有觸覺的超蓮，近日獲邀首次出席巴黎時裝周，為隆重其事，她以一身民族風造型，配襯波鞋亮相，另外又以高貴打扮配襯高踭鞋示人，展現不同的形象。超蓮大呻當地交通繁忙，往會場途中遇上塞車：「中間要落車跑去會場，唔係好慣着高踭鞋搞到跌吓跌吓咁！」到達會場後，超蓮見到藝人Angelababy、韓星孔孝真等，即變身小粉絲，分別向她們「集郵」留念，又大讚兩人好靚。

溫碧霞晒仙氣

期間，超蓮與Baby言談甚歡，她說：「Angelababy話佢翌日就要離開飛到倫敦工作，而我就會睇晒成個Fashion Week先走。」問到首次去時裝周睇騷有何感受？她說：「好震撼，嚟到睇咗第一個品牌騷，現場好靚、好大，搭咗個好大嘅帳篷，台中心有人跳舞，喺後台我仲同設計師Maria Grazia Chiuri傾偈同合照。」

至於藝人溫碧霞亦有份睇騷，穿上吊帶長裙盡顯仙氣，並指完騷後會在當地逗留多兩日，順道拍攝寫真集；內地女星王子文更以奇怪妝容搶鏡，成為另類焦點。

何超蓮遇見孔孝真（左），不忘合照留念。	Baby於巴黎鐵塔前影靚相。	溫碧霞穿吊帶裙亮相夠晒飄逸。

蔡依林變「大媽」

至於另一品牌時裝騷中，台灣天后蔡依林以「大媽Look」示人，與型男余文樂齊齊睇騷，成為焦點，二人更Chok爆大擺甫士合照，十分老友。