莊思敏輕狂歲月抱打不平
藝人莊思敏（Jacquelin）自小性格反叛，讀書時已經是問題學生，十多歲開始吸煙飲酒，打交更是家常便飯，幸她是學校校隊才能避過踢出校，她笑言整個中學生涯不是打波便是打交，過了一段年少輕狂的歲月。
撩是鬥非 推撞扯頭髮
Jacquelin中學時就讀於大坑的香港真光中學，雖然是女校生，但經常打交生事，令師長們大感頭痛，是需要高度關注的學生，更曾一度被頒下禁足令，只可以在所屬的班級樓層出現，她說：「當時因為好小事就打交，好似睇對方唔順眼之類，而且我哋班有個肥妹經常畀人蝦，我就幫佢出頭，我哋打交都只係推撞、扯頭髮同扯衫。試過因為打交被記缺點、小過同大過，有一年差啲畀人踢出校，但我係校隊，老師叫我將功補過先冇事，所以我好畀心機打籃球同玩田徑。」
她坦言當年不喜歡讀書，成績算中下水平，數學科尤其差，她笑言記得有老師指她沒有前途，見她運動好就建議她去投考警察。
籃球場初戀 收情信罰企
天生手長腳長的Jacquelin，甚有運動細胞，中一已經成為田徑及籃球校隊，除在學校內，亦不時在維園的籃球場跟男生打波，與男生實力不相伯仲。因為運動的關係，令她成為學校風頭躉，吸納不少師妹粉絲：「都有幾個師妹向我示愛或者暗戀我，有次有個師妹將封示愛嘅情信寄返學校，當然畀訓導主任截咗封信，佢仲當眾朗讀，搞到全校都知，我仲因為呢件事要罰企。因為封信係匿名，所以寄信人冇事，而事後寄信嘅師妹都有同我道歉。」
Jacquelin的初戀亦發生在籃球場上，當年讀中三的她與年長一級的籃球隊師姐拍拖，問到是誰採取主動？她笑說：「當然係佢追我啦，大家都鍾意打波，又啱傾，佢又對我好，咁就好容易一齊，都拍咗年幾拖，細個拍拖好簡單，都係出街Hea！」
未天黑已飲醉
除了碼頭煲煙，Jacquelin還會蒲茶餐廳與樓上酒吧飲酒，誇張到下午4時已開始飲酒，未夠6時已經喝醉。雖然身為拿督千金，但當時她比其他同學的零用錢都要少，一星期只有一百元，要靠幫人補習及教打籃球，才夠平日的使費。
回想當年，她笑說不復年少氣盛，脾氣亦收斂不少，更不會衝動如昔：「依家唔會追人打啦！我連走都走唔郁，中學畢業之後就冇再做運動啦！記得當年真係好有團隊精神，為咗跳高少少，我日日綁住個沙包喺對腳行路，好有鬥心。依家都仲有幾個中學同學係好老友，大家會不時聯絡。」
避風塘打躉吹水
由於學校位於大坑，Jacquelin與同學放學後，除了練波，就是到銅鑼灣打躉，更加在避風塘的碼頭留下不少煙頭。
她稱大家會爬到隧道出口的頂蓋吸煙吹水，想不到拍照當日竟然有一班中學生在相同位置上拍照，她笑言：「十幾年之後，呢度都仲係學生嘅聚腳點，不過我當年就唔係咁乖，幾個同學會夾份買一包煙一齊食，我生得高大，所以未夠年齡買煙都未試過畀人查身份證。」