創作歌手黃意雅孖師弟林作，昨日為合唱歌《最簡單情歌》拍MV。黃意雅指特意做林作的唱歌老師進行惡補，問到有何評價時，她倒吸一口氣笑說：「教咗3個月，開頭一聽到真係覺得要畀苦功練，佢都好畀心機，OK啦！」問到林作最近出Post講「分手」一事，他指：「我每個禮拜都經歷失戀同墮入愛海，上星期失戀，今個星期熱戀，新歌都講中我心情。」
