朱晨麗被洪永城鬧到喊
藝人朱晨麗（朱朱）、洪永城（Tony）及吳若希日前為無綫新劇《多功能老婆》開工，拍攝一場爭風呷醋戲份，朱朱先躲在一旁培養情緒，未幾已蓄勢待發，導演一聲令下Roll機，Tony即七情上面向朱朱破口大罵，她二話不說眼淚長流，並起身拖住小演員走，沒料到小演員不慎絆倒，幸沒有大礙繼續拍攝，結果幾Take便完工。
完全融入角色
對於眼淚長流長有，朱朱笑言劇集已拍了過百日，演員間產生了感情並投入角色，加上Tony又交到戲，真情流露。問到現實中可會是呷醋女友？她說：「唔係，平時我都好堅強，係女俠，以往嘅男友都會聽我講，雖然有時問佢之前，內心已經有個決定，但都會尊重同體諒對方。無論拍拖或者婚姻都要有信任，唔可以成日疑神疑鬼，要對自己有信心。」
吳若希係醋娘子
Tony笑指是全劇最認真的一場戲，絕對是「振夫綱」，問到可遇過呷醋女朋友？他說：「梗係冇。（舊愛唐詩詠呢？）佢都不知幾正常，完全冇呷過醋！（都係同行明白啲？）都係嘅！」吳若希近日忙於拍劇，由老公負責湊女，問到她是否醋娘子？她說：「都係，好在老公唔會令我成為呷醋嘅人，因為佢識避忌，令我好放心。」
