張振朗勸湯洛雯減磅：大隻過機場特警
無綫小花湯洛雯於新劇與張振朗有咀戲，昨日兩人出席活動時未咀先鬥嘴！120多磅的「靚湯」被取笑比機場特警更大隻，努力減磅的她有信心回復選美時的弗爆身形。
張振朗、湯洛雯、楊明、蔡思貝及鄧佩儀等昨日到將軍澳電視城，為新劇《機場特警》試造型及拜神。飾演空姐的湯洛雯笑言其制服造型已很性感，並笑問演特警的張振朗是否很期待與她拍咀戲？他即答：「好似你期待啲！」
有信心回復弗爆身形
近期發福的湯洛雯，被張振朗取笑「靚湯」變「肥湯」，比特警更大隻，她即笑說：「我接受嘅，可能遲啲有纖體廣告搵我，咁我又可以變番『靚湯』，好彈性。」張振朗笑說：「佢已經好勤力，我叫佢減少少，冇可能大隻過機場特警，佢已經食得好清淡。」
湯洛雯自爆現時120多磅，希望減10磅：「我有信心可以去番選美嗰陣咁弗，哈哈。」而張振朗則笑言：「呢套可能係史上最多除衫戲嘅劇，因為個個都操到咁弗，有好多成班人除晒衫沖涼嘅戲份。」
蔡思貝剪髮眼淚心裏流
至於蔡思貝透露為演特警而剪了一頭短髮，兼要戒口令身體線條更明顯：「剪短頭髮都驚觀眾接受唔到，但今次意義好重大，好似由零開始，所以自己親手剪，剪嗰陣眼淚在心裏流，不過為角色都值得。」提到好友余德丞出院，她表示探過對方，康復進度理想。而楊明為演機場特警操大隻及曬黑，自爆有不少更衣室戲份，自嘲是機場更衣室特警。