Bob遇賤嘴蕭正楠被安排後事啋！

Bob（左起）復工，蕭正楠與張振朗卻唔收口句句夭心夭肺。

藝人林盛斌（Bob）、蕭正楠及張振朗，昨日與一班美女學徒出席「美女船P」活動，是Bob「通波仔」後首度復工，見他精神不錯，記者打趣指他剛病愈就對住一班靚女，他笑說：「啱啱復工就要面對咁大場面，都擔心頂唔順，不過之前拍《美女廚房》台前幕後都好照顧我。」他謂暫時不能太操勞，問到上船是否負責𥄫女？他笑說：「係呀！但𥄫完都要做，不過難得約齊，所以冒住第三條血管有事都要去玩。」並表示兩個月後會通第三條血管，現時要控制飲食，幸工作沒有大影響，亦沒有大損失。

不過，蕭正楠及張振朗卻以另類態度「歡迎」Bob復工，句句「夭心夭肺」：「佢唔喺度我哋做得好開心，做咩咁快返嚟？」二人又表示已幫對方諗定「身後事」，蕭正楠說：「佢有老婆同咁多仔女要照顧，我同阿朗已經分咗工，如果佢就咁冇咗，仔女就阿朗照顧，財產就我幫佢分配，但依家佢冇事，下次先啦！」又講笑指張振朗要做Bob的女婿：「等十年後啦！」之後才正經表示會提醒對方注意飲食及身體。

上船畀女圍冇備案

講到與靚女玩船P，是否要幫Bob頂？蕭正楠說：「呢方面佢又冇事。」問到玩完可會驚被另一半扭耳仔？張振朗即說：「我冇呀，畀媽咪扭囉！」蕭正楠即「教路」：「唔好此地無銀咁驚，面對呢啲問題要冷靜。」隨即坦言沒有向女友黃翠如備案：「佢真係唔係好知，佢呢排拍劇拍到天昏地暗。（咁你咪冇王管？）又唔係，你估想o架咩？公司要做吖嘛，為公司咋，哈哈！」

面對大場面，Bob笑言「𥄫完都要做」。

美女學徒鍾晴性感出海。