丁可欣歌悼七年情邀前度重拾舊歡
「火雞姐」歌手丁可欣（Yanki）與前度阿聰拍拖七年，今年分手，傷心過後二人仍然保持聯絡，直言會一齊打籃球，關係變了老朋友。她更以這段舊情作為創作新歌《剩下我的回憶裡》的靈感，寫下這段七年情的點滴，可謂一字一淚。她說：「首次全首自己填詞，係最刻骨銘心嘅感受，雖然分開咗，但仍然好多謝呢份過去嘅愛。首歌錄咗好耐先錄到，因為次次錄時，啲情緒撳唔到。（錄到喊？）有一、兩次，感覺好複雜。（依家再聽會唔會都想喊？）會，但明白自己係過渡中，初初MV剪起咗，我都唔夠膽睇，身邊認識我同阿聰嘅朋友，好多睇完首MV都喊，因為佢哋話見住我哋拍拖，所以覺得好心痛。」
用西蘭花求愛
Yanki坦言已放下感情，視前度為好朋友，更邀他任MV男主角，親身演繹她們的愛情故事。MV中阿聰拿着西蘭花送給Yanki，她則用腳頂着對方條腰撐上半空，又攬又抱，十足真人騷，她說：「當初佢真係用西蘭花追我，朋友見證所有嘢，所以佢哋話睇完好難過。但其實我唔係想帶出我哋呢段情有幾難過，係想表達愛會令人成長，我同佢喺呢份愛中成長，我哋都冇事啦！冇大家諗咁Sad，佢仲會關心我近排工作點，我都會支持佢，如果有能力都想盡量幫佢。（有冇機會復合？）自己冇諗，每一個決定都係認真，唔係兒戲，只係身邊朋友覺得我哋好可惜，但都同我哋講，希望我哋努力面對各自人生，會幫我哋打氣。」
