街頭拍戲醉漢騷擾 千嬅：唔係好驚
楊千嬅與郭富城近日合作新片《麥路人》，前晚大隊於大角咀拍外景時，遇上一名洋漢鬧事，最終報警收場。千嬅昨日接受訪問時表示：「當時係拍我、萬梓良同郭富城嘅群戲，聽聞好似有個外籍人士喺現場擾攘，我睇唔到過程，只係聽工作人員講，因當時我哋喺化妝間準備緊，事發時工作人員叫我哋返入去等，都係擾攘咗一陣。其實拍戲有時都會遇到呢啲情況，可能有人飲咗少少酒喺度講多兩句咁，劇組有經驗識處理，所以我哋真係唔係好驚。」
至於城城經理人小美表示：「城城、萬梓良同千嬅等喺街尾化妝，劇組照顧得好好，唔畀佢哋走近現場，免受滋擾。反而我同導演親眼見到個醉漢胡言亂語、刻意徘徊影響拍攝，即使警察到場，佢都漠視，叫囂程度仲變本加厲，令大家很嬲，最後交由警方處理。」而電影公司表示不打算追究該洋漢，對於有警員在制服男子時受輕傷，感到抱歉。