傅嘉莉遭前輩言語欺凌
藝人傅嘉莉主演的劇集《特技人》現正熱播，飾演明星秦臻的她透過角色道出辛酸，她表示角色剛入行被前輩欺凌，同時面對壓力及挫敗。問到現實中可有類似經歷？她坦言初入行做Model時，試過被前輩用言語「欺凌」：「但會諗係咪自己唔叻，做唔到先會畀人哋有說話，所以將件事攞好嗰邊嚟激勵自己做得更好。」又謂試過被指演技差不開心而匿埋喊，見到報道誇張亦會發脾氣：「依家唔開心我會整頭飾嚟發洩，同埋愈話唔好就愈要做好自己，令人另眼相看。」
講到劇中有不少動作場面，她覺得難度最高是行鋼線：「難度喺我同朱朱（朱晨麗）一齊行鋼線要互相畀力，是但一個畀多咗力就會推對方落去，初頭未知度力，佢有少少向後，我想兜佢向前，點知兜唔到，所以兩個反咗，我畀啲鋼線刮到隻手，但依家好番啦！」
另外，該劇被部分網民抹殺他們辛勞付出，傅嘉莉在社交網上載與演員飯局照片，並發文「又一次證明，演員背後辛酸，外人好難理解。網民憑空想像，把事實顛倒，實在好令人費解，希望大家多用欣賞的角度去看每件事情，多些欣賞每個artist所付出嘅努力。」
髮型：Ray Mork @ Fifth Salon
服裝：Henry Lau @ SPY
頭飾：Faa