龐景峰主子失寵慘被踢落床

龐景峰自小受母親郭秀雲的薰陶，熱愛動物，家中養有五貓一狗，日前他與女友Peggy帶愛犬Ugly游水作物理治療。Andrew表示狗狗是由朋友交給媽媽收養，笑言家中經常成為動物暫養之家：「好多人執到動物都會畀我媽咪，Ugly係一隻水上狗，喺沙灘執番嚟，當時已經幾歲大，我哋養咗佢十一年，所以佢依家已經係一隻老狗。由於年紀太大唔可以跑太多，所以就帶佢游水，對關節有幫助。」

支持領養寵物

Andrew第一次帶Ugly游水，他按照犬隻訓練師Eric的指示去做，他稱初時Ugly略為緊張，慢慢才懂得放鬆。

Peggy與柴犬玩了半天，總算心滿意足了。	Ugly已是老狗，龐景峰帶牠舒展一下筋骨，以免機能退化。	龐景峰與Peggy帶領狗隻暢泳，人狗都玩餐飽。

Peggy沒養小動物，她在現場負責帶領一頭柴犬游水，她坦言十分喜歡柴犬那可愛的外貌及人性化又忠心的性格，雖然恨養，但她會聽從未來奶奶郭秀雲的呼籲，支持領養，不會購買寵物。

一生三個老闆

Andrew笑言自己的寵物即是女友的寵物：「其中一隻貓當正Peggy係主人，佢會踢我落床，張床只可以得佢同Peggy。我唔會介意，我一生中有三位老闆，一個係媽咪，第二個係老婆，第三個係將來嘅女兒。」明顯Andrew已當正Peggy為未來太太，看來他不止是動物奴，還是老婆奴呢！

場地：The Grand Dogaroo Pet Hotel