38歲林盛斌通波仔5粒鐘：三條血管塞晒！
現年38歲的藝人林盛斌（Bob）日前因三條心臟血管栓塞而需緊急入院做通波仔手術，由於情況嚴重，手術做足五小時，費用更高達數十萬元！死裏逃生的他慶幸及早發現問題，否則後果堪虞，如今大步檻過，他相當感恩，並感謝各界的支持與慰問。
與老婆育有四個小朋友的林盛斌，加埋兩位家傭，要養起成頭家極不容易，日做夜做終捱出病！前晚他於社交網上載身在醫院的照片，留言指「好大鑊」，要做通波仔手術。昨日，他接受電話訪問詳述病情，並指慶幸發現得早，否則後果不堪設想：「其實上星期久唔久就出現抖唔到氣，下巴、手臂麻痹嘅情況，去到星期一（8月27日）晚就非常頻密，第二日即刻去醫生度Check，發現心臟三條血管塞晒，要即刻入院，當時我仲話呢幾日有好多工作，可唔可以遲幾日？醫生就同我講命仔緊要，如果遲咗做，隨時暈低救唔番，咁我當然即刻入院啦！」
兩個月後再做手術
由於情況危急，Bob即找心臟科醫生朋友幫手做通波仔手術，更因血管塞得太厲害，花了足足五小時才完成手術，他說：「我深夜十二點開始做，做到凌晨五點，醫生都話好少卅幾歲個心臟會塞成咁，應該因為壓力令到身體咁差，叫我要放鬆心情同埋注意日常作息，因為怕身體負荷唔到，依家通咗兩條血管先，仲有一條要兩個月後再做手術。」
缺席錄影《美女廚房》
自在社交網公開病情後，Bob收到幾百個問候短訊，令他很窩心，並感激各界關心：「真係好多謝大家，我亦逐一回覆，覆到電話都冇電，亦因為我要休息幾日，好多工作要順延，本來一陣要去拍《美女廚房》都拍唔到，之後要拍廣告、同埋有其他工作，全部都要順延，要麻煩好多同事配合，仲要同客戶講聲唔好意思，佢哋個個都好好，叫我保重。」
已回家休息的Bob，住院三日兩夜連手術費，埋單數十萬元，令他大呼肉赤：「好番真係要畀心機搵錢啦！不過，當然健康最重要，依家冇事都好好彩同好感恩。（有冇嚇親老婆？）佢見慣大場面，不過呢幾日都要為我頻撲奔走，因為我啲錢喺晒佢度，所以佢要走嚟走去，好多謝老婆！」