楊怡雙喜臨門叫老公送樓揸手
由郭晉安、周勵淇與楊怡等紅星孭飛的劇集《再創世紀》即將播出，同年同月同日出生的周勵淇及楊怡昨日出席記者會時獲眾人賀壽，心情大靚的楊怡開到口叫老公羅仲謙儲錢送樓，恨有生日驚喜！
藝人楊怡、郭晉安、周柏豪、周勵淇（前名周麗淇、Niki）、鄧佩儀、蔚雨芯與無綫高層杜之克等，昨日到將軍澳出席TVB新劇《再創世紀》記者會。兩位女主角楊怡與Niki拖手進場，碰巧兩人明日同樣39歲生日，一眾演員為她們送上蛋糕及花束，柏豪更獻聲唱生日歌賀兩位壽星女。
預咗被拒：我哋細水長流
生日又出新劇的楊怡被指「雙喜臨門」，若加上老公羅仲謙生日又生B則是「大四喜」？她聞言笑說：「你哋兜個圈問呢啲嘢！承你貴言啦！依家好Fit，順其自然啦！（見你哋慶祝生日好Sweet！）畀人Po咗先，等我又快啲Po番啲相，都係食飯慶祝。」問到可會期待老公送禮物？她笑說：「我成日叫佢儲錢買層樓寫我個名咁，佢就會話『唔使送啦，唔需要慶祝一剎那，我哋係細水長流』！（你哋唔係買咗樓？）都可以要嚟投資，我都想有驚喜！」
安仔笑周柏豪似「葉榮添」
至於安仔在劇中演新角色，笑指柏豪的角色有幾分當年《創世紀》中「葉榮添」的本色。提到相隔十九年後拍系列續作，重本飛到布拉格拍外景，未有同行的柏豪笑言「酸溜溜」，安仔則笑說：「你可以去布拉格拍MVo架，或者十九年後拍《再三創世紀》囉！」
