同城城變「孖公仔」周潤發搵專人教揸槍
影帝周潤發與郭富城等昨午到中環宣傳新片《無雙》，談到先後到溫哥華及泰國等地取景兼拍足兩個月，兩人頓變「孖公仔」，周潤發笑說：「見少日都唔得！（拍完點算？）佢有兩個嚤囉（妻女）陪佢嘛。」近期熱愛做運動的他指對方是其啟蒙老師：「見佢拍完戲都咁勤力做運動喎！我依家都身手敏捷哋。」
周潤發被城城踢爆於「槍林彈雨」下拍足兩星期，吊威哋之餘，又找專人學習正確揸槍姿勢：「80年代嗰啲要拍足半年，相比今次真係唔算辛苦。我搵人教槍操咗幾個月，活到老學到老。（今次題材涉及偽鈔，驚唔驚犯法？）申報晒！政府知我哋印咗幾多，拍完畀番晒佢哋。」
另外，同場的張建聲早前擔任ViuTV節目《全民造星》評判引來劣評，他解釋：「我只可以講同所有參賽者都有交流，但時間所限都剪咗好多，今次經驗令我明白做評判唔易。」