林慧倩享受日日畀人打
演員林慧倩（Giselle）入行以來多做主持工作，早前擔正做武打電影女一，除了拳拳到肉，更有份唱主題曲。百足咁多爪的她，還與友人合資開餐廳做老闆娘，揚言有信心一年內回本再開分店！
Giselle憶述拍戲點滴，雖然要捱更抵夜，仍不覺得辛苦：「套戲拍咗兩、三個星期，每日都拍十幾廿個鐘，但我好享受，幾個女仔一齊練習，係有好多瘀傷，大家都係想做到導演嘅要求。」電影以綜合格鬥（MMA）為主題，經常要拍攝擂台打鬥場面，令她瘦了十磅：「當時食得好清，好似兔仔咁食沙律，仲整親舊患，但我OK。」
有份唱主題曲的她初嘗唱歌滋味，同時擁有人生第一首歌：「我入行講嘢比較多，但其實好鍾意唱歌，好開心有呢個機會，呢首算係中度激情嘅慢歌。我有八級鋼琴資格，都會考慮自彈自唱拍片放上網。」
搞餐廳想開分店
除了做藝人，Giselle近期與幾位朋友投資開餐廳，她說：「間餐廳分兩層，上層係法國菜，下層就可以舉辦啲underground音樂會，等大家可以聽歌。（你唱？）都可以喎。（驚唔驚兼顧唔到？）我都係負責公關同市場工作，主力交畀拍檔，有信心一年內回本，都想開多間分店。」但講到感情生活，她坦言以事業為重，暫沒有拍拖打算。