貝安琪婚禮突押後！
名模貝安琪（Ankie）與未婚夫Simon訂婚快2年，婚期一拖再拖，本定於9月底在香港舉行婚禮，卻突然再延期，現落實11月中舉行，但日子逼近，兩人竟又對場地出現分歧，Simon理想的沙灘婚禮依然未有着落，而Ankie已有後着，免到時空歡喜。
Ankie與加拿大籍男友Simon Van Damme於2016年8月訂婚，兒子Sebastian已1歲多，終於有時間籌備婚禮！日前Ankie到設計師好友Susanna Soo的店舖試婚紗，對當中兩套愛不釋手，其中一套更可兩着：「婚禮當日只用一套，唔想好似搞大騷咁不停換衫，所以一件兩着好啱我，除咗件紗，可以當Party Dress。我同Susanna識咗好耐，一向好欣賞佢嘅設計，同埋佢知我心意。」Susanna透露根據Ankie的喜好，婚紗以簡單及高貴為主。
「地點都未定實」
Ankie婚禮將分三回進行，9月初簽字：「簽字我哋會緊張啲，因為呢個真係結婚，唔係派對，要好嚴肅。」而原定9月底舉行結婚酒會，但現有變卦，改至11月中，之後會應媽咪要求有中式擺酒。
問到改期是否太多事宜要籌備？她說：「我好輕鬆，身邊有朋友幫手，但地點到依家都未定實，我本身搵咗個地方，但老公唔係好欣賞，佢想再好啲，咁等佢搵。（時間好緊迫？）係！但佢想喺沙灘舉行，話結婚得一次，想好浪漫，要最好嘅，但我有同佢講過沙灘好熱，個個都好辛苦，暫時我搵咗個地方有室內同室外花園。」她透露只是小型婚禮，約請80人，問到媽咪劉香萍有否畀意見？她說：「佢唯一意見係想我哋搞中式，佢好傳統，但呢樣要遲啲先，未定日子。」