孫耀威開騷發癲冧歌獻老婆
歌手孫耀威（Eric）昨日為11月16日在九展舉行的「孫耀威演唱會2018」辦記者會，一班由出道支持他至今的歌迷專誠撐場。由於首度在港開騷，內部訂票即告爆滿，唱片公司即場宣布加開17日一場，歌迷更送上歷年來與Eric的合照及短片，證明他「凍齡不老」！Eric指個唱主題名為Hysteric，除了包含自己的英文名Eric，亦有歇斯底里的意思，意指會讓歌迷在演唱會見到他瘋癲一面。
有信心應付紅館騷
受訪時，Eric很開心雖然未正式開始宣傳演唱會，但反應熱烈，透露現時每周做4日健身練氣：「呢個騷自己籌備咗多年，今年再唔開真係便秘！多謝歌迷一直等我，出年已經係入行25年喇！」問到會否留一手開紅館騷？他說：「唔使留，我仲有好多手嘅！今次場地容納4,000人，亦比較近距離易接觸到。個唱會歇斯底里，有血有肉，有戰爭、有炮火，充滿視覺效果！（歌酬放晒喺製作費？）基本冇問過歌酬，做呢個騷唔係為錢。（太太陳美詩會上台？）唔會，畀佢入嚟睇都算係咁喇！」續指知道太太喜歡他的作品《永遠保護你》，所以到時必定會唱給她聽。
