馮盈盈語出驚人初戀「濕晒」
前港姐馮盈盈性格大癲大肺，聲音響亮得連隔籬廠亦能清晰聽到，再加上經常語出驚人，完全拋開港姐形象，入屋之餘，亦甚受傳媒歡迎，因為每次訪問她也會有意外驚喜，最經典可算是其「拍喊戲幻想死老竇」！
話說演齡尚淺的盈盈，於無綫劇《果欄中的江湖大嫂》其中一場面對黃嘉樂逝世的喊戲，被網民激讚演得出色，盈盈竟說：「當時幻想『死老竇』，所以角色成功絕對要多謝阿爸。」另外，她與同是港姐出身的麥明詩主持節目《後生仔傾吓偈》時，其中一集大談與初戀男友首次約會的感覺，她竟然以「個地下都濕晒」來形容，其實她想表達當時緊張得不停出手汗，嚴重到滴落地上。至於近日她為新一輯《美女廚房》擔任嘉賓，廚藝不精卻一臉自信說：「唔理係咩材料，我都當係芝士焗龍蝦咁煮。」認真亂咁嚟。