關楚耀把持唔住戀上女拍檔
入行12年的關楚耀由歌手發展到做演員，今次棄咪走入公仔箱執導演筒，首次拍攝無綫劇《特技人》扮大導演，他自爆契爺譚詠麟以「過來人」身份提醒，叫他小心女拍檔的電力太強，但無伴一身輕的他依然瞓身入戲。
現年35歲的關楚耀（Kelvin）唱歌與拍電影可謂經驗豐富，但拍電視劇則是處男下海正式「入屋」，他說：「係開心嘅，呢套《特技人》係上年拍，終於播喇！係自己第一部無綫劇，所以另有一番感覺。」無綫經常鬧「小生慌」，今次找來他演出，對觀眾來說可謂一股清泉，但他沒想過這一層，反而是明白愛演戲的人，最緊要是遇上好角色有好發揮：「我依家35歲，我當然希望45歲時又會做另一個層次嘅嘢，另外一種角色嘅感覺，可能做人爸爸喇！每個階段都有唔同人生經歷，好期待。」
拍劇博入屋？「起碼係機會」
Kelvin在圈中兜兜轉轉，同樣星途浮沉多年的陳家樂早前憑首度演無綫劇而成功彈出，成為新一代師奶男神。正所謂「珠玉在前」，Kelvin可會有所期望？他說：「家樂佢好成功，但我又冇特別話要得到咩，亦冇諗，做演員真係唔知套劇出街後受唔受歡迎！我都係Enjoy拍攝過程同宣傳期，因為又可以見番晒拍檔，約埋一齊睇首播，呢個最期待。（揮低陳家樂做師奶男神？）唔知、冇諗！起碼今次係一個好好機會，畀大家多認識，同畀機會我做戲，肯定嘅係今次拍完令我更加鍾意演戲！演戲同唱歌都係藝術，只係唔同方法去紓發情感，而做戲就可以投入唔同角色入面。」
情傾傅嘉莉？「唔係佢杯茶」
契爺譚詠麟（阿倫）年輕時亦曾拍過無綫劇，問到可有分享心得？Kelvin笑說：「係喎！你知佢成日講笑喇，佢有提我小心啲，以為佢叫我小心身體，點知佢係話叫我小心啲女主角電力好勁喎！因為佢知道拍劇大家要相處三、四個月。（驚你動真情？）係呀！怕我假戲真做，所以佢畀咗啲意見錦囊我。（佢應該畀唔到意見你，佢可能試過把持唔住？）咁我唔知佢係咪怕我把持唔住喇，咁佢都係關心我啫！」劇中與他最多對手戲的女藝人傅嘉莉，正正屬於「超強發電廠」，加上正藉「單身狗」冇拖拍，問到拍攝時可將寂寞的心投放在她身上？Kelvin相當老實說：「投放當然有喇！戲內角色真係要面貼面入戲，但戲外就冇。（咁肯定？）我都唔係佢杯茶。」
拍拖例散？「自己冇問題」
去年與韓國女友甩拖後，Kelvin的感情生活未有着落，連關媽媽都替他着急，笑言多得鄭嘉穎：「就係阿媽睇到嘉穎結婚嘅新聞，話阿妹都有穩定男友，咁就燒埋我嗰疊！」拍拖多次仍未能修成正果，可知「死罪」是甚麼？他認真想了一想說：「真係冇喎！真係覺得自己冇問題，亦冇諗自己有冇問題！兩個人拍拖冇話啱同錯嘅，其實我每段感情都視對方為結婚對象(o架)！（唔怕依家興老夫少妻？）唔係興唔興嘅，年齡呢啲好死嘅，兩人一齊係要講感覺嘅。」
