「樓王」李龍基 遭偷車牌賊「勒索」
在圈中有「隱形樓王」之稱的李龍基，在中港兩地至少擁有七個物業，他與葉振棠、陳浩德接受本報專訪時笑說：「寫得我咁少？起碼話我有3千幾間呀嘛！」低調的他不欲多談，原來他曾被「勒索」，陳浩德爆料說：「早年佢試過喺停車場畀人剝咗個車牌，貼張紙寫住『你要攞番個車牌就打電話畀我』，依家再話佢有咁多層樓，佢可能死梗。」李龍基直認其事，最終給了幾百元了事。
李龍基再自爆曾被屈錢：「偷我銀包，入面有護照、信用卡、身份證，可能我有卡片喺度，佢打嚟話每攞番一樣要畀一千蚊，後尾我淨係要番身份證，其他都唔要。之後又試過被人打爛車玻璃偷袋，四條寶馬車匙冇晒。」陳浩德還笑他：「有錢人係咁(口架)啦。」他坦言錢解決到的問題就不是問題，錢財乃身外物。
談到三人將於9月21至23日在伊館舉行《三生有幸經典傳奇演唱會2018》，身為老大的葉振棠表示他們不會爭歌唱，亦不怕互爆大鑊，他們笑說：「我哋都冇衰嘢好爆。」