梁朝偉學琴喪玩預告停產

拍戲多年的梁朝偉，想放假由朝玩到晚。

影帝梁朝偉前晚與唐嫣、導演馬楚成於銅鑼灣出席首映，他指完成香港最後一站宣傳後，就會放假繼續去玩，直至一月為另一新片開工，他笑說：「繼續去玩，我好多運動，好似帆船、爬山、滑水、風帆、衝浪，但係樣樣都唔叻，只係貪玩，之前拍電影學彈琴，仲愛上咗彈琴，依家有跟老師學，上午去做運動，下午就學琴。（唔夠時間玩？）係呀，所以咪唔拍戲囉！哈哈！（有冇話畀太太劉嘉玲知唔拍戲？）我話咗畀佢聽好多次，佢話最緊要我開心，其實去到呢個階段係隨心，想拍戲就拍戲，想做乜就做乜。我都鍾意拍戲，遇到想拍嘅先拍，唔係就繼續玩，最開心係呢個階段。」

抽時間陪屋企人

拍戲36年的梁朝偉指忽略了家人，未來會多抽時間陪伴他們，又稱對自己要求高而感壓力大：「之前睇牙醫先知道我有磨牙習慣，冇拍戲就冇磨牙喎，太緊張，想做到最好。（轉咗太太做經理人會唔會輕鬆啲？）唔關事嘅，純粹係唔同階段做唔同嘅嘢。（叫太太放慢腳步陪你？）佢邊慢到，秋天叫佢陪我睇紅葉先攞一個星期假期，佢鍾意熱鬧，我就鍾意自己一個人。」

梁朝偉近年愛上玩帆船，不時參與比賽。	唐嫣以開衩裙亮相首映。	蔡穎恩抽空到場睇戲。

唔夠膽演舞台劇

問到會否像太太一樣演舞台劇？梁朝偉笑說：「唔夠膽做，以前唱歌已經好驚，舞台劇仲驚，要講緣分，睇吓夠唔夠膽，放得低就去做。（再搵經理人？）唔知，講緣分。（爭住做你經理人？）我唔知喎，要問劉嘉玲，我真係工作唔多，暫時佢頂住先啦，我成年都唔拍戲，拍完下套可能我又一年唔拍。（半退休？）又唔可以話半退休，隨心，想做就去做。」