陳苑澄再跳「玩命舞」贏番信心

無綫昨日舉辦《2018香港小姐競選》之「現場觀眾至Like表演」，20位候選佳麗進行才藝比併，並由現場觀眾即場投票，最後由E鞏姿希及O陳苑澄（Tania）平分秋色摘冠。

鞏姿希並列雙冠軍

曾是女團As One成員的Tania，早前玩「Kiki Challenge」在路邊走出車廂「玩命」跳絲帶舞，卻換來負評而爆喊道歉，但她未有忌諱仍以此出戰！穿上運動Bra Top的她又踢腿又做側手翻，技驚四座。問到為何仍選擇絲帶舞表演？她解釋：「一路都練習開，後來都同監製商量過。（唔怕勾起網民記憶？）事情已發生咗，我會努力之後嘅比賽。（攞咗獎心情會好啲？）心情穩定番，要Focus將來。（怕被指跳絲帶舞博出位？）做錯就要認，做好自己。（有冇信心﹖）之前係低落咗，但最近做瑜伽嚟平靜心情，盡量唔上網、唔睇留言。」

鞏姿希以性感戰衣上陣，身材與舞姿同樣吸睛。	鞏姿希	李芷晴舞嚟舞去，一烏身先見真章。

觀眾投票選三甲

表演拉丁舞的鞏姿希身穿恍如比堅尼Top的戰衣性感上陣，展示出高超舞功！擁有十多年跳拉丁舞經驗的她原來曾代表香港出賽，坦言對獲獎感到突然。至於熱門之一的G丁子田與I工藤佑采齊齊失準，前者彈鋼琴甩拍子，後者拉小提琴則多次走音！丁子田解釋因緊張所致，工藤佑采則不承認有失誤。

陳曉華玩噴畫，觀眾睇到恰眼瞓。	梁致欣輕輕一夾，即時醒神。	工藤佑采拉到走音都話冇失誤，最終落敗。

此外，大會監製何小慧透露將以票選形式選出三甲：「19日深夜12點，大家可以透過big big fun投票畀五位佳麗，到時嘅分數聯同大會評判嘅分數，最高分嗰三個會成為最後三強，冠亞季都會由觀眾投票嚟決定。」