鄭嘉穎陳凱琳趕生豬仔

嘉穎與Grace早前在峇里舉行浪漫婚禮，婚後在當地玩多幾日，順道為嘉穎慶祝生日。前晚兩人返港，十指緊扣步出機場，一黑一白襯到絕，更大騷婚戒，任影唔嬲。Grace聽到記者叫她「鄭太」，即刻冧笑，嘉穎即表示「慢慢就慣」。問到Grace送了甚麼驚喜給老公？嘉穎搶答：「唔使驚喜！已經有最好禮物畀我！」早前盛傳她有喜，難道雙喜臨門？嘉穎說：「有好消息先講啦，都未有消息！（呢幾日好努力？）慢慢啦！（生豬仔？）豬年有排，聽講豬仔有福氣！」Grace亦夫唱婦隨稱奶奶未有給予壓力，順其自然。

唱情歌冧掂老婆

提到婚禮當日兩人爆喊，嘉穎承認遇到感動事便會喊，至於接新娘時高唱《一千個願意》，原來老婆就是這樣「唱」回來：「係小弟剛剛出道時嘅歌，佢聽過，我話：『你好鍾意呢隻歌？』佢話：『歌詞係咪講我o架？』咁好明顯係講你啦！唱完就成功娶到老婆。」他指一班姊妹伴娘好幫手，反而取笑兄弟團只顧拍片，由他一人搞掂，Grace即冧爆說：「好叻呀你！」兩人續表示不會在港補擺喜酒，之後會再去度蜜月，但就玩神秘：「（去邊）梗係唔話你知啦！」

講講吓都要攬一攬個老婆！	晒婚戒	有冇見過咁調皮的嘉穎？

爆老公如廁後求婚

新任鄭太昨晚出席品牌活動，穿上紅噹噹谷胸裙亮相，笑言仍未習慣被叫鄭太：「好生外，嘉穎都有叫『鄭太』玩吓，我有叫佢老公。」問到是否不設防造人？鬼妹仔的她得知意思後說：「唔好問我咁尷尬嘅問題啦！」提到去年底嘉穎求婚，原來是他們飛加拿大時，嘉穎在機上趁她想瞓覺之際，去完廁所回來便突然跪下，令她感動到喊。至於未有邀「少婦聯盟」一班姊妹觀禮，她不擔心對方會嬲：「佢哋明白只係好小型嘅婚禮，我欠佢哋一餐飯，由我埋單。」

兩公婆落機後都係返酒店休息。

陳父急步往公廁。