陳苑澄爆喊認衰6度鞠躬道歉

《2018香港小姐競選》20位佳麗昨日到銅鑼灣進行宣傳，前組合As One成員(15)陳苑澄（Tania）因拍「Kiki Challenge」影片被指罔顧交通安全，遭網民群起鬧爆，事件後首度露面的她零表情。

未「被退選」刨心理學書

似是有備而來的Tania接受訪問時即爆喊，期間多次轉身抹淚，她說：「我拍片時係輕率，冇諗過後果，令到觀眾有咁大抨擊，好對唔住！我罔顧咗安全，自己係有疏忽，對唔住。（畀TVB照肺？）監製何小慧有搵我傾偈，討論點去處理件事，因為始終有影響，畀咗好多意見，依家係一個好好懺悔嘅階段。（勸你退選？）冇！好對唔住，令大家有咁多抨擊，當時冇諗咁多。」問到會否擔心負上法律責任？她未有正面回應：「好對唔住，對年輕人做咗個非常唔好嘅榜樣，對唔住。（喊到眼腫？）唔係，尋晚拍到朝早六點，同埋諗點去回應呢件事。（擔心影響選情？）希望公司、大眾原諒我，好對唔住。」而大會方面亦就事件發聲明，表示已向Tania了解，並告誡她有關行為可能違反道路交通條例、罔顧自己及其他人士的安全，往後要多加注意。

陳苑澄解畫時哭成淚人，要由工作人員陪返後台。	無論買嘢還是睇書，陳苑澄都係一副愁樣。	放大圖片

活動後，Tania與其他佳麗乘專車到灣仔附近，車內換衫後便直往天后港鐵站解散，她獲保母護駕搭港鐵。當保母下車後，她獨自乘車往青衣，頻頻低頭撳電話，更拿出一本心理學書籍細閱，邊睇邊皺眉兼不時愁爆掩面。下車後，她急急腳往便利店購買飲品，然後返回附近寓所。

庄嘉慧厚粉遮紅印

另外，早前因傷缺席外景的(2)庄嘉慧（Kathy）手臂繼續有紅印，問到可有掌握化妝技巧遮掩？她說：「冇o架！技巧就係夠厚粉就遮到。（康復得切？）醫生話要多一星期，只係微絲血管問題。」在分組比賽化妝奪「最佳彩粧達人獎」的她被指急起直追，她笑說：「希望我可以把握到決賽嘅機會，好好表現自己。（有信心贏？）一直都好有信心，唔係就唔會參加。」至於(18)高育英講廣東話口窒窒兼「天然呆」，表現麻麻。