莫竣名由「靈」開始貪平買凶宅
ViuTV節目《入住請敲門》大受歡迎，贏盡網友口碑，早前再度「冧莊」找來主持人莫竣名（Louis）及林婷拍攝第二輯，犯禁挑機殺入靈界，但最恐怖最心寒並不是兩位主持人「撞鬼」，而是林婷的表現！皆因上集她表現細膽，令大批網友插爆大呼無癮，但今集表現大膽又冷靜儼如「鬼上身」，對於網友指她表現才是最恐怖的環節，她說：「係心理問題，拍第一季聽到網民咁講都有唔開心，拍嗰陣冇咁靈探，我當係拍綜藝節目。第二季方向清晰啲，多咗靈探地方，成件事我有晒準備，知道個地方出過事，定好多。」
林婷高原遇怪事
她憶述在高原拍攝的驚險事，短片竟然離奇不見：「明明攝影師係有Roll機，但唔知點解冇咗，解釋唔到。」
至於Louis則自爆曾「被鬼壓」，拍畢節目更生病收場：「去泰國酒店拍攝，間房好凍，冷氣機校到成25度都好凍，我突然感覺到被鬼壓，我係清醒嘅，當我郁到嘅時候我印象中係有即刻睇吓部機有冇拍到。後來我睇番剪片，見到當時我只係呆咗坐喺度。拍完成個節目之後我感冒咗一個星期，返香港嗰日其實都好攰，我都有諗關唔關事。」講到連猛鬼酒店兩人都敢去兼入住，問到將來會否購入凶宅作為「上車」之選？他笑言：「冇乜所謂，平啲添，可以買夠兩層！」