扮「阿姐」點吳浩康岑樂怡嗌過癮

藝人岑樂怡在ViuTV劇集《REBOOT》中演社團大家姐，由於平日演慣乖乖女角色，今次搖身一變，經常聲大大兼粗鄙示人，絕對是大挑戰！她說：「劇入面我有好多o靚，吳浩康係其中一個，其實我本身係後輩，所以每日開工都勁尷尬，但一聲令下Roll機，我又變咗阿姐級，不知幾過癮！一叫啲人就要聽晒我話，同平時好唔同，其實我OK，因為反差大！」為演好角色，開拍前她參考了不少電影揣摩，問到導演可滿意其演繹？她說：「OK喎！都收貨，第一日開工好大壓力，之前一晚瞓唔着，好在係喜劇，大家排一次先Roll機，睇吓Jam到啲咩出嚟。慣常大家已經係咁笑，所以都預計到出嚟會係咩反應，唔會衰得去邊。」