Olee大阪燒顯功架
東網巨星節目《星級煮意》今集請來小女團A Little Bit Shy（ALBS）成員Olee施展小廚神功架，煮小朋友愛食的「大阪燒」，現年10歲的她，原來4歲已經下廚，每逢長假期會同媽咪一齊刨烹飪書。
Olee愛日本料理，今次選擇「大阪燒」是因為容易製作，啱晒小朋友，她說：「唔難整，只要跟住步驟就得，同埋媽媽都會喺旁邊提點我每一個步驟，有大人在場好重要。」
母女齊研究食譜
她享受煮食過程，主要是受到媽媽的薰陶，有時還會整壽司、包餃子：「我覺得自己整係特別好味，仲好享受個過程。同埋我好鍾意睇媽媽煮飯，我4歲左右就開始整吓三文治，每年暑假，媽媽會畀我試吓煮嘢食，每次我都會好小心，所以媽媽唔會太擔心我會整親。」
兩母女會交流煮食心得，只要放假，Olee就會成為「小宅女」，與媽媽一齊煮嘢食、睇烹飪書，上網搵食譜試整，她最想學習不同的菜式：「嚟緊打算學中菜，因為我好鍾意食肉餅，所以想試吓整嚟食。」
梁祖堯教點樣爽脆
「劇界廚神」梁祖堯對Olee提供建議，指若果想「大阪燒」口感更佳，可將椰菜刨絲然後浸冰水，令椰菜更爽脆，至於落醬汁時，可以利用保鮮紙將醬汁包着，以牙籤篤窿，再將醬汁唧在「大阪燒」上，外觀會更好。
材料：
預拌粉、山芋粉、木魚絲、脆米、海苔粉、雞蛋、160cc水、油、已醃豬肉片、醬汁、椰菜
步驟：
1.預拌粉、山芋粉加入雞蛋攪拌，期間不斷加清水
2.攪成粉漿後加入椰菜絲，攪勻備用
3.電熱鍋搽上油，以中火熱鍋後倒入粉漿，鋪上醃好豬肉片
4.蓋上鍋蓋後焗兩分鐘，將其翻轉再焗兩分鐘
5.上碟加上木魚絲、脆米、海苔粉及醬汁
《星級煮意》每集請來不同藝人示範不同菜式，想睇小廚神Olee煮食功夫？大家可透過東網及東網網頁，隨時隨地免費收看及重溫。
https://bit.ly/2LTQ47O