「荷里活影壇一哥」湯告魯斯（Tom Cruise）前日率領新片一眾「湯女郎」出席在法國巴黎鐵塔舉行的全球首映禮，更遙遠祝福炒車重傷的好友佐治古尼，但揚言唔會被嚇怕而唔敢揸電單車！
靚佬湯與新片《職業特工隊：叛逆之謎》（Mission:Impossible-Fallout）拍檔「超人」亨利卡維爾（Henry Cavill）及西蒙柏奇（Simon Pegg）等出席首映，其中包括五位「湯女郎」莉碧嘉費格遜（Rebecca Ferguson）、米雪摩納嘉（Michelle Monaghan）、Alix Benezech、Vanessa Kirby及安琪拉貝茜（Angela Bassett），靚佬湯全晚「畀女圍」，艷福不淺！他與大批影迷互動後，即會合眾索女在巴黎鐵塔前影大合照。而片中飾演大奸角的亨利最近受訪時，因發表對#MeToo運動的個人睇法而被狂插，事後他發文道歉，並強調自己絕對尊重女性。
至於去年因拍攝《職》而受傷的靚佬湯在紅地氈上受訪時，被問到影星好友佐治古尼（George Clooney）日前駕電單車時發生車禍受傷，56歲兼同樣愛揸電單車的他叮囑對方：「小心啲呀！佢揸電單車技術好好，希望佢冇事，我嚟到呢度先知件事，佐治，我希望你OK啦！」問到會否因此而嚇怕減少揸電單車？他講笑說：「永遠唔會，電單車會放棄我，我就唔會放棄電單車。」
另一邊廂，因車禍而導致盆骨、手臂及膝蓋受傷的古尼已出院，前日他首度被影到現身機場，與老婆Amal及兩個仔女乘坐私人飛機離開，受傷的他仍面帶笑容，上機時顯得小心翼翼，以欄杆借力支撐步行上機，而手㬹位亦有明顯傷痕。