陳家樂被陳友逼出真眼淚

藝人陳家樂、王梓軒、林耀聲、吳鶴謙與導演陳友因電影《兄弟班》而結緣,影片以溫拿樂隊真人真事改編,一班新進演員紛紛自我挑戰,林耀聲由不懂彈Bass到可以彈幾首歌、曾捉錯戲路的陳家樂找到正確方向,陳友當然居功不少,但他下「禁令」不准他們向溫拿請教,以免「學壞」!

陳友率領新片演員接受訪問,他指飾演溫拿五虎的演員中,最神似是飾演葉智強的林耀聲,因為都是少說話的人,而陳家樂、王梓軒都很勤力,吳鶴謙則音樂造詣最高。

林耀聲曉彈幾首歌

王梓軒指林耀聲最愛挑戰極限,拍戲永遠由零開始:「佢以前拍棒球戲,但原來唔識打棒球,今次佢飾演嘅角色要彈Bass,佢又係完全唔識,但經過苦練,拍嘅時候可以彈到幾首歌,好犀利!」林耀聲笑言自己下了不少苦功,拍攝前、拍攝期間都花了很多時間苦練,練到喇叭都爛埋!

陳家樂直言今次拍戲一度捉錯戲路,幸得陳友扶番正:「有一場戲話我畀爸爸用鐵鏈鎖住唔畀彈結他,我就邊喊邊斬開條鐵鏈,但下場戲就係任達華好搞笑咁講對白,咁我一度覺得,我嘅喊係咪都應該用搞笑嚟配合,但導演叫我要用真感情喊,出嚟效果亦好有對比。」

下禁令唔准學溫拿

陳友則覺得觀眾好有智慧,若果拍戲不用真感情,觀眾難有共鳴,他還直言拍攝該片有「一不准」——不准演員向溫拿成員請教:「首先唔想佢哋學壞,第二,我唔係拍溫拿自傳,係拍年輕人嘅故事,似唔似根本唔重要!」

場地:1563 At The East Live House and Restaurant

王梓軒服裝:Neil Barrett

林耀聲服裝:ithk