港台主持曾志豪直播爆粗被「封咪」11日

從事電台工作逾20年的主持曾志豪禍從口出,竟然在直播節目公然爆粗,雖已三度道歉,仍遭聽眾喪插,激到電台高層扭耳仔、掌嘴及嚴厲訓示,再「封咪」以作處分。

現年40歲的港台資深節目主持曾志豪昨日在直播節目《瘋Show快活人》中爆粗「×你老味」,令人嘩然!雖然在節目中兩度Say Sorry,惟聽眾仍不停狂轟,節目專頁短短一小時已有逾百留言,當中不乏鬧他教壞細路:「我個女喺身邊問我,點解可以咁?身教?」、「完全唔覺得你有悔意咁道歉」,更要求他退休,不過都有觀眾撐他。

三度致歉

節目後,曾志豪在港台機構傳訊及節目標準組總監伍曼儀陪同下就事件作交代,他再三致歉並表示衰在「上帝之手」:「我要播兩條宣傳片,期間同其他主持為自己嘅工作發忟憎,點知我推錯咗個開咪掣,嗰句『唔應該講嘅說話』就出咗街。」他承認「爆粗」是不專業、失誤及冒犯觀眾,唯一做得正確是沒逃避、肯正視問題,此事令他緊記:「話到嘴邊留半句。」並願意接受電台任何處分。

電台接投訴

伍曼儀斥他犯了冇可能犯的錯:「好唔專業,基本開咪都錯,無論咪前、咪後,唔理鬧邊個,用詞要小心謹慎、要慎言,唔可以再有同類事件發生。」不過經她了解後,相信曾志豪是無心之失,目前要先刪除網上節目重溫出現問題的聲帶,而電台至昨日傍晚收到投訴、意見及慰問電話逾30多個。至於如何處分?她指曾志豪由今天起「封咪」,暫停主持周一至五的《瘋》及周日的《中女宅男殺很大》節目,至本月23日再開咪,由於他屬節目主持人合約,電台毋須發警告信。