唐詩詠入得廚房 田蕊妮讚啱做老婆

藝人唐詩詠（Natalie）、田蕊妮與黃翠如感情要好，前晚田蕊妮邀請她們食「住家飯」，Natalie大顯廚藝炮製「唐氏滷水雞翼」，另外兩餸一湯則由入得廚房出得廳堂的阿田一手包辦。三人邊食邊影相及拍片，期間Natalie親自餵翠如食愛心雞翼，場面溫馨。雖然翠如全程冇幫手，但相當識做，在社交網留言賣口乖，大讚阿田係煮飯強人，並指Natalie炮製的雞翼水準極高，而阿田更幫Natalie做媒人：「佢真係好啱做老婆！有邊個想娶佢可以傳訊息畀我。」