森美嘲陳豪好假 HeHe情決裂

陳茵媺
我老公就有Taste嘞！（設計對白）

曾合拍電視劇《誇世代》而譜出「基情」的森美和陳豪，前晚齊任節目嘉賓，自認有條「皇帝脷」的森美大爆曾在節目中「造假」，明益電台節目拍檔阮小儀：「幕後黑手就係我，畀咗10分，唔係佢點贏到！」又話除因小儀煮得好食外，另一原因是她跟兩位又高又靚的Model作賽，為免順得哥情失嫂意，所以給小儀贏就皆大歡喜。

着白褲唔怕當場嘔？

至於鮮有亮相試食節目的陳豪說：「我係抱住好新鮮嘅心態、好純潔嘅身體嚟接受挑戰，希望唔好染污我啦，哈哈！」森美毫不留情寸爆：「你今晚就染污啦，等你仲着白褲，當場嘔o架！好似上次Jinny（吳若希）嗰塊生雞扒，一食你終於知道自己係直腸直肚！」大放笑彈，引來全場笑爆。

森美：今晚就染污啦，當場嘔！ 陳豪：我以好純潔嘅身體嚟接受挑戰。 陳豪、森美一唱一和，全場爆笑！

張振朗（左起）、蕭正楠與林盛斌（右）訪問嘉賓森美（右二起）、陳豪及余德丞。

字典中冇「唔好味」

問到陳豪愛妻陳茵媺今集可會亮相？森美一副恍然大悟樣：「如果唔係唔會『無端端』（做嘉賓），我都覺得奇怪！」陳豪笑住否認，並大讚太太：「佢啲廚藝唔係好叻，但OK，不過淨係小朋友餐！」森美似呷乾醋，唔執輸表示也試過整分子料理給仔女，不過食後會吐出。陳豪更護妻說自己的字典只有「好味」沒有「唔好味」，森美聞言即踩他「好假」：「太太下廚有『唔好味』，不過我未試過講。」兩人同樣曲線冧老婆。