子華阿媽被問候喊住收咪
「子華神」黃子華的棟篤笑，繼續令大家邊笑邊領悟出哲理，除了論盡名導王家衛和王晶，又提到曾被「問候老母」，反映現時很多香港人仇恨心重。講明是「收咪之作」，子華特別感觸，哽咽喊住唱歌！
黃子華一連26場的棟篤笑前晚在紅館開鑼，之前講過完騷後便「收咪」，故他大講特講，講金句之餘，亦從社會、政治、娛樂等方面講香港這幾十年來的狀況。
大卡士「自由行」冇人明
當中他論盡「雙王」導演──王家衛與王晶，先說王家衛當年的《阿飛正傳》就算有大卡士，但演員行來行去似「自由行」，票房勁蝕，因為冇人睇得明！又謂認識很多電影人不喜歡王家衛：「因為佢蝕大本？唔係吖，小弟都拍咗套《一蚊雞保鑣》，好似收咗五位數字，蝕大本都冇人憎我喎！」他又將王家衛與王晶比較：「我諗王晶唔係好鍾意王家衛，因為佢拍咗部戲搵我扮王家衛，我估係特登搵我嚟刺激佢，我喺入面個名仲叫『王晶衛』。」
為妓女發聲
話明今次是「18禁」，子華當然講了很多較敏感的話題，例如為性工作者發聲，認為要規管嫖客，並提議安排警犬「睇住」妓女工作。他亦聲援陳冠希：「咁多年全香港都冇人夠膽幫佢平反，我都唔夠膽，但我依家唔撈啦，是鬼但，因為邊個出嚟平反就係變態，香港講到性就係變態。」
他亦提到現時的香港是尋找仇人的故事，並分享兩件事，其中一件是棟篤笑門票第一日開賣後，很多人搶不到飛，他就在網上見到有人開了專頁叫做「黃子華老母問候區」；第二件事是其電影《棟篤特工》上映後，有網友讚幾好睇，但被另一人鬧「全家落地獄」。
掟杯畀觀眾
臨近尾聲，子華把飲過的杯掟給觀眾，並表示巨星收山前會唱一首歌：「巨星收山必然係會復出，但我唔係巨星，只係有啲觀眾緣，但我就係想唱歌，我要唱粵曲。」隨即清唱《幻海奇情》：「勞碌半生忙打拚，想喺太平盛世，做個小明星……」期間他一度哽咽唱不下去，拿出紙巾抹鼻及眼睛，大家即拍手鼓勵並叫他「唔好喊」，之後他續唱：「我回首望住個紅館至醒悟，能夠與各位喺度歡樂一笑，都算係幻海奇情。」最後他瀟灑擺低咪在櫈上，轉身行落台離開。