「學霸」奪金冇行情 林奕匡靠音樂畀女追
歌手林奕匡昨日到中學出席DSE放榜打氣活動，講到當年在加拿大讀書的公開試成績，原來他是一名「學霸」，物理、化學及數學都攞滿分，勇奪第一名，他笑言：「嗰陣有省議員頒個金牌畀我，全省得幾個人有咋！（你好叻喎！）唔係，只係小心啲啫，我練習到3個鐘嘅試卷用個幾鐘就做完，其他時間就Double Check，所以咪攞滿分。」
講到讀書叻應該吸引好多女同學鍾意？林奕匡笑言不是，自誇是靠音樂吸引女仔，但因怕醜而反被女仔追，而初戀就是在15歲發生。雖然中學讀書成績好，但讀大學時就相反，他解釋因為搬去溫哥華太大誘惑，只顧打機，成績差到險些被踢出校，但後來經父母鼓勵，轉科後成績終於叫做「見得吓人」。