澄清老公離完先娶 李悅彤：未搞好咪重婚！
四年前因介入導演彭順婚姻及屋企發生巨變，女星李悅彤（Liddy）連番受打擊，從此鮮有於幕前出現，但最近被爆已婚及懷孕五個月，並於葵芳開設生活百貨店。昨日，獨自看舖的她抽空接受本報訪問，見她腹大便便仍踎低執貨！她透露今次自掏腰包幾十萬投資，雖然舖租高達10萬，但仍有信心很快回本。
意外有BB 唔諗復出
談到有指圈外老公是澳門富商，兼未辦好離婚手續，Liddy不欲多談老公背景，只透露是生意人：「我哋係今年初結婚，嗰時都未有BB。如果未搞好，咁佢咪重婚！」又指當時有行禮及擺酒，懷孕卻是意料之外，她說：「本身都打算生，但冇諗過係依家。」
對於做過「小三」，再次投入感情有否諗清楚？她表示與老公拍拖是五年內的事：「老公畀到好大信心我，所以先結婚。（老公知你以前啲事？）相信有華人嘅地方都會知！咁每個人都有過去。」至於有否後悔？Liddy淡然指事過境遷，不欲多提：「人要向前望！想好好地過生活，佗B過程好辛苦，但係人生嘅新階段，期待11月預產期。」又直言暫無意復出：「幕前好忙，我依家都好多嘢搞，夾到時間先諗。」