陳家樂林夏薇Jam歌險吵大鑊

陳家樂、林夏薇跟大批Fans歡聚，好Happy呀！

陳家樂與林夏薇舉行粉絲聚會，朱晨麗、于淼及二百名粉絲頂住33度高溫撐場，期間大玩遊戲，以身體不同部位與粉絲夾氣球，最後由穿上四吋高踭鞋的薇薇隊伍勝出。及後家樂拿結他與薇薇自彈自唱，薇薇於表演前踢爆前一晚夾歌趣事：「約唔到時間一齊練歌，惟有用視像電話夾，佢彈我唱，點知佢成日話我入慢咗，我就話冇理由，因為首歌我都熟，之後試咗幾次都係咁喎！我堅持我冇入錯，真係差啲夾到嗌晒交，因為大家都覺得自己冇錯，後來先發現係佢個電話Delay咗！」家樂對此也忍不住大笑。

提早慶生氹壽星女

歌唱比賽出身的家樂已有兩、三年沒有拿結他公開獻唱，所以事前有點緊張，不過粉絲收貨，才放下心頭大石，他說：「今次聚會都成功，之前擔心得十幾人，冇諗過套劇播完都仲有咁多粉絲掛住我哋呢一對，咪趁呢個機會同佢哋見面同影相，希望佢哋年尾都記得投我哋票啦！」

兩人又彈又唱，原來之前一晚只用視像電話夾過。

林夏薇即將生日，獲陳家樂提早慶祝。

薇薇則表示沒想過連海外粉絲也相當踴躍：「專登買機票飛嚟香港支持我哋，有馬來西亞、新加坡，仲有啲內地嘅朋友，估唔到第一次粉絲聚會係同家樂一齊搞，原來咁好玩、咁熱鬧，希望年尾頒獎禮都繼續支持我哋，投我哋神聖嘅一票！」眾人更於活動上，提早為本月30日生日的她慶祝，令她非常驚喜。