昔日性感女神彭美拉安德遜（Pamela Anderson）的前夫湯美李（Tommy Lee），於父親節撰文唱衰她教壞兩個仔，結果反遭大仔鬧他從未盡老竇責任，又上載早前自己打暈湯美後拍的短片，再一次羞辱老竇！
彭美拉與湯美離婚已20年，但還是一對冤家！前日父親節，湯美於Instagram（Ig）上載與父親的黑白合照，感嘆「做老竇真係唔容易」，借機向前妻及兩名兒子開火，自言曾希望像父親教自己一樣，可以教兒子做人道理、尊重別人及珍惜所有，可惜事與願違：「如果佢哋整爛嘢，佢哋唔會在意，因為會有新嘅；如果佢哋傷害咗人，亦唔會關心，因為好多人同佢哋講『冇問題』！」湯美又指兒子唔生性，大部分責任在於前妻，最後表示：「我好愛我嘅仔，但佢哋真係X街。」
彭美拉的22歲大仔Brandon即留言反擊：「你需要盡老竇責任嘅，大隻佬！如果你認為我哋咁壞（而我可以好肯定話你知我哋唔係），咁你就應該出席吓多啲生日會同棒球賽。好似你咁嘅人，係教唔出我呢種人。我比你似男子漢多一倍。」Brandon又叫湯美「過主」，否則會打暈他，並上載早前兩父子爭執，將湯美一拳打暈後拍的短片，當中湯美露出肚皮瞓在地上不省人事。據知彭美拉支持Brandon的言論，又指湯美離開她時，細仔Dylan只有7個星期大，湯美只有基因上是他們的老竇。
不過，父親節也有溫馨例子，前球星碧咸（David Beckham）於Ig上載為聯合國兒童基金會拍攝的影片，分享做老竇感受，驚嘆時間過得太快，又自爆仔女出世後，至今仍會每晚入房數次看他們。而盛傳與他婚變的Victoria則上載仔女與老公的合照，大讚他是「最佳老竇」。