呆嫂故弄玄虛博見報

有啲藝人,滿腦子都係博見報嘅計謀,不知幾識幫自己做宣傳,就好似「呆嫂」咁,當仲未公開拍拖嘅時候,成日做訪問都專登引記者問感情事,到人哋問咗佢又含春咁笑住話唔答,狂扭屎忽花,真係畀佢玩謝。

對佢嚟講,博見報嘅招數又點只呢招?有次「呆嫂」着到成個拳擊手咁去睇演唱會,仲一早入場坐正喺記者嘅後兩行,擺到明又係想見報啦!不過當晚有大把明星紅過佢,排隊影都未輪到佢,喺臨開場之前,先有記者眼尾望到佢,出於禮貌就請佢企起身影張相,佢懶係不經意咁話:「我坐咗喺度好耐o架啦,係你哋見唔到我咋!」然後笑晒口咁企起身,當記者影完轉身走,見佢黑晒口面咁坐低,真係人前人後兩個樣。