陳柏宇拒剪臍帶：核突咗啲！
歌手陳柏宇（Jason）昨日出席童樂日活動，身為準爸爸的他忘記今日是父親節，又表示要在飛機上度過：「因為我今晚11點幾就要飛去斯德哥爾摩做嘢，要去10日。」但老婆符曉薇（Leanne）不會同行，他說：「萬一佢有咩唔舒服就難搞，喺香港可以有屋企人照顧。（會掛住佢？）會啊，呢排都想多啲陪佢，但工作忙，而且我又一定要去操肌，因為下個月有演唱會。」他表示出發前會與老婆撐枱腳，又坦承暫時對父親節未有特別感覺，笑說：「出年都可能未，等佢（BB）識爸爸嘅Concept先。」
預計陪入產房
Jason透露老婆的預產期是10月，問屆時可會停工陪伴？他說：「暫時未有（計劃），因為佢係開刀，所以唔使驚突然生。（擇咗日？）佢自己揀咗。」至於會否陪入產房？他搞笑說：「當係先。（你唔使做剪臍帶嘅儀式咩？）我唔係太着重呢啲儀式，留番畀Leanne剪。」記者即笑他冇人性，他說：「醫生都係儀式上畀你夾住，唔係真係你去剪。（你唔係驚呀？）又係核突啲嘅，但我唔係怕血，只係個情景的確核突咗啲，同埋重點都唔係BB出世嗰陣做幾多儀式，係出世後點樣照顧佢。」