森美教囡囡搵男友要似老竇
育有一子一女的藝人森美昨日以玩具節大使出席活動，指現時對待子女要追又要氹，特別是青春期打後，關係要「亦父亦友」：「食飯係要氹佢哋過嚟，唔係『過嚟食飯啦！過嚟啦！』，如果佢哋唔出嚟，會入房睇吓佢哋做緊咩。」
森美坦言對住13歲的女兒管教不嚴，全因關乎其終身幸福，笑話：「佢第時搵男友就知Standard，搵個對自己好啲嘅男仔，將來都幸福啲。」相反，他對15歲的兒子較嚴，揚言要多畀挑戰：「男仔要照顧一個家要理好多嘢，要畀多啲鍛煉同訓練佢。」原來之前瘋狂操弗的森美，私下亦會叫囝囝一齊做掌上壓，問到兒子身形健碩？森美搖頭指對方後尾冇再操：「我又唔會逼佢，佢做到就算。」
