呂慧儀唔敢造人派老公講數

呂慧儀大爆囝囝唔想有細佬妹同佢爭寵！

處境劇《愛．回家之開心速遞》的一班演員呂慧儀、劉丹、蘇韻姿、林淑敏等昨日現身公開活動。長腳蟹的兒子「蟹籽」現時三歲多，問她會否追多個女？她稱暫時未有計劃：「講就容易，個個都叫我生，我話唔得，我要拍劇，湊大一個好大件事。」又指要先跟「蟹籽」傾掂數，笑言對方好霸道：「佢唔肯同人Share父母，我怕佢會趁BB未識反抗揼個B，依家有表兄弟姊妹同佢玩，佢覺得已經足夠，我有問過佢想唔想要細佬妹，佢搖頭，今個父親節我要派個任務畀老公，叫佢同囝囝傾掂數！」

母子分工整手作

提到父親節，長腳蟹表示今日要開工，會提早慶祝，又指已跟「蟹籽」做了小手作給老公：「畫咗條領呔，由我負責畫，囝囝填顏色，不過囝囝話我畫到好似蘿蔔咁，我叫老公要戴住條領呔出街。」

劉丹獲「阿女」呂慧儀同蘇韻姿獻吻，甜入心！	一眾演員出席活動，氹得「老友記」十分開心。	蘇韻姿晒香肩，盡展青春活力。

孫女日日錫劉丹

另外，劉丹透露兒子劉愷威與新抱楊冪均不在港，已提早食飯慶祝，問到孫女有何表示？他坦言：「佢仲細未識，佢有錫啖我，日日都錫。」問到《愛．回家之開心速遞》會否添食？劉丹表示最新收到三百七十多集的劇本，希望可以超越《真情》。