王敏德嚴父發威 狠招一拍兩散
今日是父親節，不少已為人父的藝人均獲子女祝賀，當然Sweet爆！當中風趣幽默的王敏德（Michael）原來是嚴父，教訓仔女雖軟硬兼施，但發火時毫不留情，凡事不過三，不聽教寧願一拍兩散。
Michael與名模馬詩慧（Janet）的仔女趁父親節表心意，合力下廚氹爸爸。三人分工合作，炮製王敏德最喜歡的帶子三文魚扒，首次品嘗仔女廚藝的Michael大為感動。講到教導兒女，Michael原來好嚴，Janet大爆：「記得佢哋細個時，好興睇細部嘅DVD，佢哋爭睇互不相讓，好嘈，跟住佢大聲叫佢哋Stop，佢哋第一次冇聽佢講嘢，第二次又唔聽，第三次佢行埋去，攞起部DVD一手掟埋去牆度，爛咗！三個呆咗望住佢，跟住就開始喊，自此之後，佢哋知道爹哋可以去到幾盡，佢惡起上嚟可以一拍兩散。」
搵馬詩慧做醜人
不過，Michael惡招不常出，還不時以冧招氹子女，Janet說：「佢都好寵啲小朋友，佢哋要咩就畀咩，有時佢哋唔使講話要，都已經畀咗先。」原來Michael不需要樣樣親自出手，精明地「假手於人」，不願開口鬧子女時，就會示意Janet做醜人。
問到三個小朋友最難忘爹哋哪次發惡？王曼喜透露試過講大話被爹哋發現，之後被大鬧，自此不敢講大話。王麗嘉自言是家中最乖巧的一個，甚少被鬧，問到爹哋會否不喜歡她放太性感的照片上社交網？她說：「佢冇同我講唔好，如果我太誇張佢會同我講，但佢冇講應該係接受到。」王躍穎就表示小時候與王麗嘉爭電視睇被罰：「我想轉台，家姐又唔畀，跟住我好大力踢佢，爹哋知道咗，即刻拖我返房，叫我留喺房閉門思過，嗰時都好驚。」
三姊弟夾份送樓
Michael是家中經濟支柱，問到會否覺得爹哋工作辛苦？王曼喜說：「都覺得爹哋努力做嘢，辛苦養大我哋，所以都想大個要好好報答佢哋，希望將來三個搵到錢，夾錢買層樓送畀佢哋。」
場地：Tas'Mania Limited