不忿老外「中指」爆粗 陳奕迅李小龍上身還擊
「歌神」陳奕迅（Eason）以代言人身份獲今屆世界盃官方指定啤酒贊助商安排，前晚現身俄羅斯睇開幕戰，Eason的出現吸引大批華人球迷注意，當中不少粉絲走上前要跟他拍照，起初Eason大方來者不拒，但球賽開始後繼續有人找他影相，還有人在附近不停偷拍，搞到Eason不太開心，還被網友拍到他竟然公然舉中指。不過，Eason的經理人甘菁菁昨日向記者解釋事件經過，還原真相，Eason並非向粉絲舉中指。
當時Eason坐在自己的座位上，被現場的中國球迷認出，很多人扮自拍，其實在偷拍他，亦有人一見Eason就湧埋去，場面頗為混亂。Eason見場面開始失控，加上座位很窄，於是企起身走落一行，叫大家不要再湧近，免生危險，甘菁菁續說：「期間有好多中國球迷橫跨咗一個外國人，嗰個外國人唔識Eason，但佢見到原來大家係為咗Eason先咁樣，所以佢就向Eason舉中指兼爆粗鬧佢，Eason覺得既然個外國人咁冇禮貌問候我，我只不過回應番佢！」她續指：「外國人都唔應該咁冇禮貌，只不過中國粉絲見到Eason好興奮啫！」