阮頌揚為夢想花盡積蓄
藝人阮頌揚（Brian）不但是讀書高材生，更是運動健將，自小以成為演員為夢想的他，放棄擔任收入可觀的臨床心理學家，毅然入行，不過入行不久，已有機會擔正男主角，謙卑的他最感謝媽媽的支持。
擁有1米80高大身形兼帥氣樣子的阮頌揚，絕對是「天生食呢行飯」，他說：「由細到大嘅夢想就係做演員，因為有次小學做話劇，畀老師選中做男主角，表演完成個禮堂都拍爛手掌，嗰刻覺得原來喺台上被人讚賞嘅聲音係好有滿足感，所以中學同大學都繼續參加唔同嘅話劇。」
多謝媽媽支持
不過，在大學修讀心理學的Brian，在家人眼中畢業後理應從事相關工作，惟他偏偏放棄擔任臨床心理學家，毅然入行，令家人大呼可惜：「當時大學畢業，我同媽咪講想入行做演員，佢聽到呢個消息後就晴天霹靂，因為佢當時諗住我讀完碩士之後可以做臨床心理學家，有份收入穩定嘅工作，但最後佢都好體諒同支持我嘅選擇，所以我好多謝佢，絕對係我最大嘅動力來源！」
做男主角感動到喊
入行不久，幸運的他早前已有機會登上大螢幕，更擔正男主角，他坦言一圓兒時心願，令他相當感觸：「因為由細到大都好想喺大螢幕出現，今次唔單止可以同唔少前輩合作，戲份亦有唔少，所以第一次睇試片感動到喊咗出嚟，總算對家人有個交代。」雖然有不少演出機會，但他仍然謙虛學習，珍惜每個機會，直言感謝所有責罵過他的導演，全都令他有所成長。
演藝之路看似一帆風順，Brian坦言亦經歷過生活拮据的時候，但依然堅持要成為演員：「入行頭半年好快用完自己積蓄，嗰段時間都有擔心過，但覺得入咗行就唔會輕易放棄，所以就咬實牙關度過，自己搵Part Time幫人補習，加上我有讀心理學嘅關係，就有學校搵我教特殊學校嘅學生，總算可以幫補吓，唔使家人擔心。」
場地：WatahhhFitness
化妝：Milk Cheng
髮型：Tin Ngai