Chris Pratt同高科技恐龍鬥戲史匹堡都喊驚！
電影《侏羅紀世界：迷失國度》（Jurassic World：Fallen Kingdom）男女主角Chris Pratt與白麗絲達拉斯侯活（Bryce Dallas Howard）早前於上海接受本報訪問，Chris透露今集「夠晒堅」，同高科技恐龍模型做對手戲！
【甄子健上海直擊】憑恐龍訓練師與漫威超級英雄「星爵」角色走紅的Chris，被問到有否收藏所演角色的公仔時說：「我有幾百個公仔，但唔係畀自己嘅！我唔會拆包裝盒，會喺盒上面簽名，之後捐去做慈善。我成個櫃都係，冇幫自己儲，或者我應該要咁做？不過我個仔都有玩幾隻公仔。」今集電影多以實體恐龍模型取代電腦特技，Chris認為對其演出大有幫助：「今次套戲係講人同恐龍之間唔止有恐懼，仲有感情，所以有個實體可以做反應好重要，用特技嘅話只能對住個網球做戲！有最高科技恐龍模型真係好正，有幕速龍『阿藍』瞓喺張枱上面望上嚟，我就摸佢、安慰佢，呢場係即興演出。」
白麗絲換鞋走難
女主角白麗絲上集穿高踭鞋走難，結果引來女權分子批鬥，今集有特寫鏡頭拍她穿上長靴，她邊笑邊解釋：「呢個着鞋嘅旅程，成為咗角色嘅代表！上集開頭，佢同自我同環境割裂，所以睇佢着高踭鞋喺森林跑好好笑，大家覺得佢一定冇命，但最後令人跌眼鏡咁成為英雄，着高踭鞋跑贏暴龍！今集唔同情況，佢喺有準備下明顯會着合適嘅鞋去冒險。作為一個堅定嘅女權分子，我仍然喺辦公室，同埋去富商大宅時着番高踭鞋，保持女性象徵。」
導演追求驚慄感
至於導演J.A. Bayona指希望今集拍出史提芬史匹堡（Steven Spielberg）執導首集的驚慄感，他指恐龍大鬧富商大宅追咬小女孩一幕，原型來自惡龍於城堡襲擊公主的童話：「史匹堡睇到屋頂嗰幕都話覺得驚！」談到近年科學家發現恐龍其實有羽毛，導演指電影為效果有時候要偏離現實：「恐龍有羽毛就唔恐怖啦！」