湯沛宜中暑暈低 撼爆眉角縫7針

湯沛宜去沙灘放鬆，點知曬暈中暑，撼爆左眉角，留有大條疤痕。

湯沛宜與性感女星黃榕今日參加健美比堅尼小姐比賽，為令原本已甚Fit的身形更結實，近期日日喪Gym三個鐘，最後幾天到「脫水」階段，更要戒鹽戒糖戒碳水化合物，務求突出肌肉線條。日前ToTo與友人到沙灘曬太陽放鬆心情，因最近減食，暴曬之下她突然體力不支中暑暈倒，撼到石壆左眉角當場爆缸，要立即送院救治，傷口頗深要縫七針，翌日撕開膠布驚見長約8cm的「蜈蚣形」疤痕。

留疤烈女不怕死

ToTo受訪時說：「呢幾日冇乜食嘢血糖低，係唔適合去曬，結果暈低撼到石壆受傷，我會食番有糖分嘅嘢，但唔會放棄比賽，會繼續出戰！（驚唔驚留疤？）冇諗咁多，過咗比賽先，聽啲打泰拳嘅朋友講，可能過幾個月個印會變淡嘅。」她上載受傷相到社交網，並留言「烈女不怕死」，又繼續做Gym及上堂練擺甫士，可見性格堅強，得到不少朋友力撐。

同樣為比賽冇啖好食的黃榕瘦了一圈，現時腰圍只得20.5吋，而且腹肌盡現，她自覺為比賽犧牲相當值得，很滿意自己的鋼條身形。

放大圖片	湯沛宜受傷後即送院救治。	黃榕狂操之下，成條鋼條咁。