姚書軼模中生有轉型增值
名模姚書軼（Mikki）曾走過不少大品牌的時裝騷，無奈時移勢易，她慨嘆經濟不景氣，模特兒無用武之地，導致青黃不接，她亦另求出路，做飲食業之餘，又讀鑽石鑑證自我增值。
姚書軼（Mikki）除了做模特兒亦另謀出路，開餐廳又修讀鑽石鑑證，去年更擔任客席導師教授香港珠寶小姐擺甫士技巧。教授學生的過程中，令她回想起初入行時的辛酸，長期穿上高踭鞋導致腳底起繭，對自身要求高亦感到很大壓力。
模界青黃不接
近年新進模特兒甚難打響名堂，問到會否覺得模界青黃不接？她說：「喺香港呢個問題好嚴重，成個時裝界環境唔算太好，時裝以前好主導，依家反而變得冇咁重要，所以少咗好多騷同展覽，變相新入行嘅模特兒冇咩機會畀人留意到。（會鼓勵新人入行？）有條件我會鼓勵，如果將來我有個女有我咁高，又身形完美，一定會畀佢入行，做過模特兒嘅氣質同眼界係完全唔同，人都會有趣啲。」
未必學以致用
此外，她又透露今年開始修讀鑽石鑑證，下年接着研習寶石鑑證，問是否想開珠寶店？她說：「我冇咁大諗法，珠寶啟動資金好大，如涉及開舖頭，未賺錢已經蝕咗一筆。（做過餐廳生意有經驗？）唔同，我做咗咁多年model，發覺自己對珠寶最有興趣，而且比較有優勢，所以要的起心肝去學，就算未必入呢行都係一種知識。」
文：音樂組
服裝：Elisabetta Franchi
首飾：Universal Jewellary