楊柳青衰太打得呻冇仔敢埋身
藝人楊柳青（Wiyona）因失戀而成為打女，由一個完全不做運動的人，變成功夫、刀、槍、棍、策騎、射箭無一不曉，務求演繹好女殺手角色，但就因為太強而嚇怕不少追求者。
由模特兒轉型做主持的楊柳青，近年再成為打女，她自爆當上武打演員並非意料之內，契機竟因為一次失戀，她坦言：「失戀之後唔想浪費時間，就搵樣嘢學去增值自己，最後揀咗詠春，覺得都幾好玩。後來我諗如果我要做演員，想畀人容易記得，就要有一個技能，所以去咗學武打。」
「怕畀我打死」
Wiyona稱除功夫外，所有關於女殺手必備的技能也會學，包括刀、槍、棍、策騎、射箭及揸電單車等，務求成為全能女殺手。Wiyona又自爆以前是運動白癡，2016年接觸功夫後，才開始做運動，她笑言：「以前我話自己油浸都唔肥，咁瘦使乜做運動，以前跟朋友學打拳，打咗15分鐘就面青口唇白兼天旋地轉，男友打籃球，我就坐埋一邊睇，完全冇諗過依家變成咁。」
Wiyona努力塑造打女形象，但無奈亦因武打形象而嚇怕追求者：「啲男仔會覺得你都唔使我保護啦！我本身已經冇乜女性溫柔，因為我係屋企嘅大家姐，所以比較硬淨，其實我都有小鳥依人一刻，但要男友先見到我呢一面，不過未成為男友之前，已經嚇走晒所有男仔。嘩！你又識功夫又刀又槍咁，佢哋都怕畀我打死。（擇偶條件係對方都要打得？）想對方都係運動型，大家一齊做運動有共同話題，如果太斯文會覺得唔夾，我鍾意好動嘅男仔。」
十年目標買大屋
現年30歲的Wiyona認為年紀只是一個數字，並感謝年齡送了經歷與體驗給她，問到下一個十年有何目標？她稱由細到大都想買間Dream House送給家人，希望可以在40歲前達成，並在十年內獲得女主角獎項。
文：影視組
服裝﹕Guess
髮型﹕Haffman Cheng
化妝﹕IG@hazesmakeup