伊健龍爪手𢭃住古巨基
歌手古巨基一連五場紅館《WE我們古巨基世界巡迴演唱會香港站特別版》前晚尾場，全場爆滿，老闆楊受成夫婦亦是座上客之一。「硬頸基」克服肩痛，懶理醫師勸喻休息，出盡全力與Dancers擒上擒落載歌載舞，又抵死自嘲：「見過鬼怕黑，我見過嗰隻鬼都幾大隻，所以都幾怕黑。」
尾場由好友鄭伊健擔任嘉賓，基仔稱自拍攝《笑看風雲》就視伊健為哥哥，又專登挑選劇照「案件重演」，不過二人睇到相就大講有味對話，基仔笑問伊健：「點解要扯住我下面？仲好大力咁揸住？呢個係星爺（周星馳）個『揸乜龍爪手』。」伊健解畫：「Benz雄（許紹雄）就掹甩咗佢條褲，我就幫佢𢭃一𢭃，你睇我個樣不顧一切皺晒皮幫你𢭃住，費事你走光。」基仔笑說：「你都掹得幾用力，咁你依家幫我𢭃一𢭃啦，今日冇人𢭃過。」場面爆笑！
墮台留陰影
騷後基仔在慶功宴受訪，重提「一秒」墮台時仍有餘悸，又表示需食止痛及鬆弛肌肉藥，亦有搵治療師按摩：「跌嗰下係有知覺，個速度快到覺得痛就已經喺地下，受猛烈撞擊之後都Chok住道氣，起唔到身。」他坦承經過今次會有陰影：「對自己記性太有自信，以後都唔會畀啲窿喺自己後面，要眼見啲窿。」
文：音樂組